Special News
សេន រ៉ានុត : អ្នកចម្រៀងដែលសម្ដេចតេជោសរសើរ
ដោយ : សិរី (ថ្ងៃទី 27 មិថុនា 2009)
ភ្នំពេញ: ក្នុងចំណោមតារាចម្រៀងស្រករក្រោយនាពេលបច្ចុប្បន្ន មានតែតារាចម្រៀង សេន រ៉ានុត តែម្នាក់គត់ ដែលសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជាសរសើរថា ច្រៀងបទប្រពៃណី និងបុរាណបានពីរោះ មិនចាញ់អ្នកចំរៀងសម័យបុរាណឡើយ ដូច្នេះគួរអ្នកចម្រៀងផ្សេងៗគួរតែយកគំរូតាមតារាចម្រៀងរូ
បនេះ ។ ក្រោយមានការសរសើរពីសម្ដេចតេជោ ប្រជាប្រិយភាពរបស់តារាចម្រៀងរូបនេះ បានហក់ឡើងមួយកម្រិតទៀតទាំងនៅក្នុង និងក្រៅប្រទេស ហើយបើតាមការឲ្យដឹង ពេលនេះលោក ម៉ៅ អាយុទ្ធ បាននិងកំពុងតែងបទច្រៀងត្រូវតាមចំណង់ចំណូលចិត្តរបស់ សម្ដេចតេជោ ដើម្បីឲ្យតារាចម្រៀងរូបនេះច្រៀង ។
ចាប់កំណើតជាកូនពៅនៅក្នុងចំណោមបងប្អូន ៧ នាក់ របស់គ្រួសារអ្នកមានជីវភាពមធ្យមមួយ នៅលើទឹកដីខេត្តបាត់ដំបង ដែលជាជង្រុកស្រូវដ៏ធំរបស់ប្រទេសកម្ពុជា សេន រ៉ានុត ដែលឆ្នាំនេះមាន អាយុ ២៧ ឆ្នាំ បាននិងកំពុងធ្វើឲ្យប្រជាពលរដ្ឋខ្មែរ មានការចាប់អារម្មណ៍ទៅលើទឹកដមសំនៀងរបស់គេ ដែលអាចច្រៀងបានគ្រប់ចង្វាក់បទភ្លេង ដូចជាមនោសញ្ចេតនា កន្ទ្រឹម ប្រពៃណីជាដើម ។ មុនពេលដែលឈានដល់ដំណាក់កាលដែលទទួលការចាប់អារម្មណ៍ពីប្រជាពលរដ្ឋ ខ្មែរនេះ គេបានហែឆ្លងកាត់នូវការតស៊ូព្យាយាមអស់រយៈពេលរាប់សិបឆ្នាំឯណោះ ។ ជាយុវជនដែលមានរូបសម្បត្តិស្រស់សង្ហារ និងមានសំលេងច្រៀងពីរោះពីធម្មជាតិ គួបផ្សំនឹងមានបំណងចង់ក្លាយជាអ្នកសិល្បៈមួយរូបនោះ ក្រោយពេលប្រឡងជាប់មធ្យមសិក្សាទុតិយភូមិ គេបានដាក់ពាក្យប្រឡងចូលធ្វើជាប្រុសស្អាតរបស់ក្រុមហ៊ុន Nestle ដោយលទ្ធផលគេជាប់ចំណាត់ថ្នាក់លេខ ១ ។
ច្រកហក់ចូលទៅក្នុងពិភពសិល្បៈរបស់ សេន រ៉ានុត ចាប់ផ្ដើមនៅពេលដែលគេបានជាប់ជាម្ចាស់ជ័យលាភីរបស់ក្រុមហ៊ុន Nestle នោះ ។ ការងារសិល្បៈដំបូងរបស់គេផ្ដើមឡើងនៅក្នុងផលិតកម្មរស្មីស្ទឹងសង្កែ ក្នុងឋានៈជាអ្នកចម្រៀងស្រករក្រោយមួយរូប ប៉ុន្តែបន្ទាប់ពីប្រឡូកនៅក្នុងវិស័យចម្រៀងនេះមិនយូរប៉ុន្មាន គេក៏បានក្លាយជាតារាចម្រៀងដែលមានទស្សនិកជនចាប់អារម្មណ៍ច្រើនឡើងៗ ពិសេសយុវវ័យ ។ ក្នុងចំណោមបទចម្រៀងទាំងអស់ដែលគេបានច្រៀងឲ្យរស្មីស្ទឹងសង្កែមាន បទចម្រៀងចំនួនបី ដែលទទួលបានការគាំទ្រខ្លាំងជាងគេ ក្នុងនោះមានបទ ‹កំផែងវណ្ណៈ!› ‹ខ្ញុំមានបេះដូងខ្មែរ› និងបទ ‹ខ្ញុំជានរណា?› ។ ជាបន្តបន្ទាប់ក្រោយមកគេបានប្ដូរទៅផលិតកម្ម Nice Star និងទៅផលិតកម្មមកពីក្រៅប្រទេសរបស់លោក ម៉ៃ សាម៉េត រហូតមកដល់សព្វថ្ងៃ ។
តាមរយៈផលិតកម្មមកពីក្រៅប្រទេសខាងលើ សេន រ៉ានុត បានក្លាយជាតារាចម្រៀងមួយរូបដែលមានការពេញនិយមយ៉ាងខ្លាំងពីសំណាក់ ប្រជាពលរដ្ឋខ្មែរ ដែលទៅរស់នៅក្រៅប្រទេស ដោយសារបទចម្រៀងដែលគេច្រៀងឲ្យផលិតកម្មនេះសុទ្ធ មិនសូវមានលក់នៅក្នុងប្រទេសទេ ច្រើនតែនាំយកទៅលក់នៅតាមបណ្ដាប្រទេសដែលសហគមន៍ខ្មែររស់នៅ ។ ដោយសារគេមានការពេញនិយមពីសំណាក់បងប្អូនខ្មែរនៅក្រៅប្រទេសបែបនេះ មានអ្នកឧបត្ថម្ភតារាចម្រៀង និងសម្ដែងខ្មែរឲ្យទៅច្រៀងនៅក្រៅប្រទេសមួយចំនួន បានយកគេឲ្យទៅច្រៀងនៅក្រៅប្រទេសជាញយដងមកហើយ ហើយប្រទេសដែលគេធ្លាប់បានទៅច្រៀងមាន បារាំង អូស្ត្រាលី កាណាដា ជាដើម ។ កាលពីថ្ងៃទី ២៤ កុម្ភៈ ២០០៩ គេបានចេញទៅច្រៀងនៅអាមេរិកមួយលើកទៀត ដោយចេញទៅច្រៀងតែម្នាក់ឯង នៅតាមរដ្ឋនានាសរុបប្រមាណ ៤០ រដ្ឋ ឯណោះ ។ បន្ទាប់ពីបានទទួលជោគជ័យគួរឲ្យមោទនភាព ដោយសារការច្រៀងរបស់គេបានទទួលការស្វាគមន៍ពីអ្នកចូលទស្សនានៅ គ្រប់រដ្ឋនោះ គេបានវិលត្រឡប់មកដល់ប្រទេសកម្ពុជាវិញនៅថ្ងៃទី ១៩ មិថុនា ២០០៩ កន្លងទៅ ។
អំឡុងពេលដែល សេន រ៉ានុត ចេញទៅច្រៀងនៅអាមេរិកនោះ នៅក្នុងប្រទេសកម្ពុជាឯណេះវិញ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានពោលសរសើរពីចម្ងាយ ។ សម្ដេចតេជោបានពោលសរសើរគេនៅថ្ងៃទី ៨ មីនា ២០០៩ ដែលនៅពេលនោះ សម្ដេចនាយករដ្ឋមន្ត្រីបានមានប្រសាសន៍ថា សម្ដេចសូមសរសើរទឹកដមសំនៀងរបស់តារាចម្រៀង សេន រ៉ានុត ដែលច្រៀងបទប្រពៃណីបានពីរោះមិនចាញ់អ្នកចម្រៀងបុរាណឡើយ ។ សម្ដេចតេជោ បានបញ្ជាក់ថា នេះជាគំរូមួយដែលតារាចម្រៀងសម័យផ្សេងៗទៀតគួររៀនសូត្រតាម ។ បទចម្រៀងលក្ខណៈប្រពៃណីខ្មែរដែលសម្ដេចតេជោកោតសរសើរថា សេន រ៉ានុត ច្រៀងពីរោះនោះគឺបទ ‹ដូចចុះនរក› ចាប់តាំងពីសម្ដេចតេជោពោលសរសើរមកប្រជាប្រិយភាពរបស់តារាចម្រៀងរូប នេះបានឡើងមួយកម្រិតថែមទៀត ទាំងក្រៅ និងក្នុងប្រទេស ។
ប្រភពស្និទ្ធនឹង សេន រ៉ានុត មួយបានបង្ហើបឲ្យដឹងថា ពេលនេះលោក ម៉ៅ អាយុទ្ធ រដ្ឋលេខាធិការក្រសួងព័ត៌មាន បាននិងកំពុងតែងបទចម្រៀងមានលក្ខណៈជាប្រពៃណីខ្មែរ ឲ្យត្រូវតាមចំណង់ចំណូលចិត្តរបស់សម្ដេចអគ្គមហាសេនាបតីតេជោ ហ៊ុន សែន ដើម្បីឲ្យតារាចម្រៀងរូបនេះច្រៀង ៕
តារាកំប្លែងនាយក្រិនរៀបការនៅក្រុងព្រះសីហនុជាមួយកូនក្រមុំស្រស់សោភាមកពីខេត្តកំពត
ដោយ : សមុទ្រ (ថ្ងៃទី 28 ឧសភា 2009)
ខេត្តព្រះសីហនុ: តារាកំប្លែងមាឌតូចល្អិតតឿដ៏មានប្រជាប្រិយឈ្មោះ ទេស សុជន ហៅនាយក្រិន បានចូលរោងរៀបមង្គលការនៅថ្ងៃទី
២៨ ឧសភា ឆ្នាំ២០០៩ នេះ នៅឯខេត្តព្រះសីហនុ ។ កូនក្រមុំរបស់នាយក្រិន គឺនាងកញ្ញាស្រស់សោភាម្នាក់ក្នុងត្រកូលកសិករនៅខេត្តកំពត ។
នៅព្រឹកព្រលឹមថ្ងៃទី ២៨ ឧសភា ឆ្នាំ២០០៩ នេះ ក្រោមផ្ទៃមេឃស្រឡះល្អដ៏កម្រមាននៅខេត្តព្រះសីហនុ រដូវវស្សាដូច្នេះនោះ ភ្លេងមង្គលការរបស់នាយក្រិនបានបន្លឺឡើងរសាត់តាមវាយោចេញពី ផ្ទះសំណាក់មួយយីហោ “ មានហេង ” ដែលមានទីតាំងនៅតាមដងវិថីសេតេ ស្ថិតក្នុងភូមិ២ សង្កាត់លេខ៣ ក្រុងព្រះសីហនុ ខេត្តព្រះសីហនុ ហាក់ប្រកាសប្រាប់អ្នកក្រុងព្រះសីហនុថា នាយក្រិនតារាកំប្លែងដែលមានមាឌតូចល្អិតប្រកបដោយប្រជាប្រិយចូល រោងការមានគូស្រករហើយ ។ ក្នុងពិធីរៀបមង្គលការនាយក្រិននេះ ក្រុមកំប្លែងលោក ជួង ជី ហៅ កុយ បានមកចូលរួមផ្ដល់កិត្តិយស និងជូនពរជ័យដល់កូនកម្លោះកូនក្រមុំទាំង២ ហើយលោក ជួង ជី ហៅ កុយ និងនាងគ្រតច្រៀងរាំក្នុងពិធីកាត់សក់ផងដែរ ។ ក្រៅពីនោះ ក៏មានភ្ញៀវកិត្តិយសផ្សេងទៀតក៏មកចូលរួមដ៏ច្រើនផងដែរ ។
តាមការប្រកូកប្រកាសរបស់លោកអាចារ្យនៃមង្គលការនេះ បានឲ្យដឹងថា នាយក្រិនមានឈ្មោះដើម ទេស សុជន កើតនៅថ្ងៃទី ៣ ខែមករា ឆ្នាំ១៩៨០ មានស្រុកកំណើតនៅភូមិស្លក្រាម ឃុំវត្តតាមឹម ស្រុកសង្កែ ខេត្តបាត់ដំបង មានមុខរបរជាសិល្បករផ្នែកកំប្លែង ឪពុកឈ្មោះ ទេស ភឺន អាយុ ៦៧ឆ្នាំ (នៅរស់) និងម្ដាយឈ្មោះ ទេស សុខាំ អាយុ ៤២ឆ្នាំ រស់នៅឯស្រុកកំណើត (បាត់ដំបង) ទាំងអស់គ្នា ។ រីឯកូនស្រីដែលត្រូវចូលរោងការជាមួយនាយក្រិននាពេលនេះមានឈ្មោះ កញ្ញា ហិន ចាន់ធៀង កើតនៅថ្ងៃទី ៥ ខែមេសា ឆ្នាំ១៩៨៩ មានស្រុកកំណើតនៅភូមិតាកោ ឃុំដំបូកខ្ពស់ ស្រុកអង្គរជ័យ ខេត្តកំពត មានមុខរបរជាងអ៊ុតសក់នៅស្រុកកំណើត ដោយមានឪពុកឈ្មោះ សំ យ៉ើន អាយុ ៤៩ឆ្នាំ មុខរបរជាកសិករ នៅភូមិតាកោ ឃុំដំបូកខ្ពស់ ស្រុកអង្គរជ័យ ខេត្តកំពត និងម្ដាយឈ្មោះ ឱន ចាន់ឌី អាយុ ៤៧ឆ្នាំ មានមុខរបរជាកសិករ នៅស្រុកកំណើតជាមួយប្ដី ។
មនុស្សម្នាច្រើននាក់ ដែលធ្វើដំណើរឆ្លងកាត់តាមដងវិថីសេតេ ដែលពុំបានដឹង និងទទួលព័ត៌មានថា នាយក្រិនរៀបការប្រពន្ធនោះ ក៏នាំគ្នាឈប់មើល ហើយយកដៃរឺតទ្រូង ខណៈពេលដែលពួកគាត់ឃើញនាយក្រិនកាន់ផ្កាស្លាក្នុងក្បួនដង្ហែលើក ជំនូន (ផ្លែឈើ) ពេលព្រឹកព្រលឹមថ្ងៃទី ២៨ ខែឧសភា នៅតាមដងវិថីសេតេនោះ ។ រីឯអ្នកខ្លះទៀតគេបានយករឿងអាពាហ៍ពិពាហ៍ និងគូស្វាមី ភរិយានាយក្រិននេះ ទៅនិយាយប្រៀបប្រដូច ក្នុងរឿងនិទានផ្សេងៗសើចលេងទៅវិញ ។ តែទោះបីជាយ៉ានេះក្ដី ក៏មានមតិមួយចំនួនបានកោតសរសើរដល់នាយក្រិនថា ជាមនុស្សមានសំណាង ព្រោះនៅក្នុងពិធីអាពាហ៍ពិពាហ៍របស់នាយក្រិនមានបណ្ដាញផ្សព្វផ្សាយ ព័ត៌មានជាតិ និងអន្តរជាតិ បានចូលរួមយ៉ាងច្រើនខុសពីពិធីអាពាហ៍ពិពាហ៍មនុស្សធម្មតា ។
ស្ដ្រីម្នាក់ស្ថិតនៅក្នុងក្រុមគ្រួសាររបស់នាយក្រិន សុំមិនប្រាប់ឈ្មោះ បានឲ្យដឹងថា ទោះបីមានគេរិះគន់ប្អូនប្រុសនាងបែបណាក្ដី ឬក៏ភាគីខាងស្រីគេមានគំនិតបែបណាទៅថ្ងៃមុខក្ដី ក៏ក្រុមគ្រួសារនាងមិនខ្វាយខ្វល់ដែរ គឺគាត់ជឿលើភ័ព្វព្រេងវាសនាទេវតាជាអ្នកកំណត់ទៅថ្ងៃអនាគតរបស់ ពួកគេ ប៉ុន្តែពេលនេះ គឺជាបំណងប្រាថ្នាតែមួយគត់សម្រាប់ក្រុមគ្រួសាររបស់គាត់ គឺបំពេញបំណងរបស់ប្អូនប្រុសគាត់តែប៉ុណ្ណោះ ។
ស្ថិតក្នុងរង្វង់ទឹកមុខសប្បាយរីករាយក្នុងពិធីរៀបអាពាហ៍ពិពាហ៍ យ៉ាងអធិកអធមនេះ នាយក្រិន (ទេស សុជន) ដែរនឹងក្លាយជាស្វាមីរបស់គេនៅពេលបនិ្ដចទៀតនេះ បានអះអាងទៅចំពោះមុខអ្នកកាសែត និងភ្ញៀវកិត្តិយសដែលបានចូលរួមក្នុងពិធីរៀបការនោះថា “ ពួកគេនឹងប្ដូរផ្ដាច់រួមរស់ជាមួយគ្នាអស់មួយជីវិត ។
យើងក៏សូមជូនពរដល់គូស្វាមីភរិយារបស់នាយក្រិនឲ្យជួបប្រទះ តែសេចក្ដីសុខដូចការអះអាងនោះផងដែរ ៕
